Calquera tempo pasado foi mellor! Así nos comeza explicando Merchi Pimentel de que se trata a “Xuntanza de Asados”, que este ano celebrou a terceira edición. A idea, certamente é moi boa, xa que “xurdiu dun encontro de amigos e amigas da infancia de entre os cales algúns, por distintos motivos, viven fora da “tribu” (Asados)”. Así que agora, unha vez ao ano, intentan quedar e lembrar vellos tempos.
Merchi explícanos que “despois de dunha longa conversa evocando recordos, típica de compañeiros que levan tempo sen verse, comezamos a argallar a posibilidade de facer unha xuntanza un día de verán; unha idea que foi pasando de boca en boca, collendo cada vez mais forma, até chegar a ser unha xornada repleta de actividades sen máis organización que a que pode ter un patio de escola, ou unha noite de festa de cando tiñamos 18!
Neste caso, as palabras non quedaron só niso. Polo que materializaron a idea e de que xeito. “O día escollido para tal evento vén sendo, dende o primeiro ano, o sábado do festival ‘Antrospinos'”.
Merchi tamén nos comentaba que “algunhas das premisas para acudir e sentirte cómodo no grupo son: pertencer a unha franxa xeracional que vai dende o 1960 ao 1975, e ter nacido ou vivido durante a infancia, adolescencia ou primeira xuventude en Asados. Aínda así, o carácter aberto dos asadenses leva a que calquera persoa que se achegue por alí, con ánimo de integración, sexa benvida”.
Para a primeira Xuntanza acordaron rescatar fotos dos caixóns; sen faltar, por suposto, a da primeira comuñón. “Fómolas pasando uns aos outros para miralas e botarnos unhas boas risas”.
“Ademais da risoterapia”, continúa contándonos Merchi, “o espírito da Xuntanza é por en práctica moitos dos xogos da infancia, escoitar música cargada de recordos, bailar moito e falar das anécdotas que cada un de nós temos gardadas no maxín, para descubrir que unha vez que as estás a contar, sempre hai alguén que a comparte e che replica que o estas a contar mal! Así, até a próxima Xuntanza, viviremos as nosas vidas de adultos, sabendo que polo menos, un día de xullo do seguinte verán teremos a certeza de que… Calquera tempo pasado foi mellor!”.
Fotos de Rianxo 
Deixar unha resposta