Hai xusto tres anos, un 22 de xullo de 2013, uns vándalos queimaban parte da ponte de madeira que vai sobre o río Te ata a praia da Torre. E hoxe, un 21 de xullo, temos que enterarnos de novo de que os vándalos atacan de novo o patrimonio público. Deben pensar que ao ser de todos non é de ninguén ou se pode facer o que se queira. Dende logo non deixa de ser un acto de ignorancia, no que non só se dana o que é público, senón que se dana o que é de todos.
Hai poucos días, en La Voz de Galicia publicábase que Rianxo é un dos concellos da contorna que ten unha maior rede de saneamento. Tal é así que só o 9% das vivendas non teñen acceso á rede de sumidoiros, fronte a concellos como Boiro ou A Pobra, que roldan o 15-16%.
Os propietarios das fincas afectadas polo viaducto do AVE ao seu paso por Isorna están en pé de guerra. E non é para menos. Séntense enganados despois de dar todas as facilidades para construír unha obra que consideran de interese público. Sete anos despois, as fincas produtivas nas que levan anos traballando, son unha especie de pedregal que en nada se parece aos terreos que tiveron que deixar. E reclaman, como é lóxico, que a empresa deixe as fincas non de calquera maneira, senón intentando que queden en condicións moi semellantes a como se entregaron.
Diferenza de tamaño entre unha avespa normal e a asiática. Fonte http://www.telecinco.es
Dende Taragoña, en concreto dende o lugar do Montiño, unha lectora do blog, Verónica, acaba de avisarnos de que descubriron un niño de nespras asiáticas. Por ese motivo, e mentres non se retire do lugar, os veciños andan con bastante medo. De feito, Verónica indícanos que “tocaremos a todalas portas que sexa necesario para que nos quiten o antes posible ese perigo de onda nós”.
Pasaba das nove da noite cando Juan Carlos Collazo, gran coñecedor no patrominio rupestre rianxeiro, nos alerta de que os petróglifos dos Mouchos foran salvaxemente danados. Unha obra con miles de anos de antigüidade, de gran valor cultural, histórico e artístico, foi estragada só co obxectivo de facer mal.
Rapidamente decidimos achegarnos ata alí, e o panorama é totalmente desolador. Como podedes apreciar nas fotografías, as dúas laxes de abaixo foron debuxadas con pintura branca, o cal ten difícil solución, pois non se poderán usar líquidos que laven a pintura sen estragar os gravados.
Juan Carlos Collazo, Xusto Xosé Ordóñez (concelleiro de Deportes e Patrimonio do Concello) e eu mesmo non podíamos dar crédito ao que pasara. Estabamos ante unha das estacións petroglíficas máis importantes de toda Europa polo gravados que conteñen, si, en Rianxo. E en lugar de apreciar o valor que ten isto, hai vándalos que se adican a atentar contra un xacemento dese tipo.
En situ, procedeuse a informar do suceso a Patrimonio. Ademais, ó longo de hoxe pola mañá procederase a informar tamén ó Seprona para cursar a denuncia correspondente.
A verdade, é que non podemos atopar unha resposta nin unha razón ante semellante atentado contra o legado patrimonial de todas e todos nós. Agardemos que pronto se poida saber a autoría de tales feitos e que polo ben da historia esto teña unha solución que nestes intres, polo menos ó meu ver, ten difíil solución.
O dito, un día triste o de onte para os rianxeiros. Non deixas de preguntarte por que alguén faría iso. E, sobre todo, se ao final ten sentido dar a coñecer onde está os petróglifos e as mámoas de Rianxo, xa que se ao final o resultado vai ser este, é mellor que sigan escondidas. Alomenos aseguramos que sigan intactas uns anos máis e non que persoas deste tipo estraguen unha parte tan importante da nosa historia.
Unha lectora do blog de Asados mándanos esta fotografía a modo de fotodenuncia do que acontece nunha das estreitas rúas da Atalaia, polo que case non poden transitar.
Imaxe de Julio Tubío
Un veciño de Abuín, en Leiro, denuncia a través da súa conta no Twitter que onte pola tarde caeu un suposto artefacto incendiario diante súa casa. Na fotografía, difundida por Julio Tubío, pode apreciarse o dispositivo. Abaixo de todo entendemos que estaría o resorte que prendería o lume, xa queimado.
Esta tarde, un veciño e seguidor do blog pasounos unhas imaxes dunha vertedura xunto á depuradora de Rianxo. As imaxes, segundo a persoa que nos informou deste suceso, corresponden ás 18.30 horas.
Dende aquí puxémonos en contacto co Concello e explicounos que se trata dun “verquido do que se informa á empresa e se agarda porque a Xunta faga as actuacións previstas que eliminarán en boa medida estas situacións”.
Actualización: dende o Concello acaban de informarnos que a policía local estivo pendente da vertedura e que esta xa cesou.
Agardamos, pois, que imaxes deste tipo non se repitan, porque sabemos que do mar depende o futuro de boa parte dos nosos veciños. Ademais, moi preto, hai unha praia na que todos os veráns se bañan centos de persoas. 
Hoxe queremos difundir as imaxes que nos pasa un lector do blog sobre uns rexistros eléctricos que hai no recheo de Rianxo. Non sabemos se están conectados á luz ou non, pero non teñen ningún tipo de protección, polo que están expostos ao aire e a que calquera os poida tocar. Actualización: dende o Concello xa nos comunicaron que se van poñer en contacto con Portos, xa que esta zona depende deles. Seguir lendo
Esta mañá puidemos ver como as familias da Vacariza (Isorna), seguen a loitar porque os seus nenos estuden nunha escola unitaria que leva décadas aberta. A Consellería e a Delegación Territorial de momento non o permiten, a pesar de que si o fan con outro centro. Hai que ter en conta que este ano habería cinco nenos, pero que para o ano aumentarían a sete. Iso si, cando unha escola rural peche as portas, nunca máis as volve abrir.
Fotos de Rianxo 