Dende o 30 de xuño e ata o 5 de xullo estivo en Rianxo o historico veleiro Joaquín Vieta para uso e desfrute de quen quixera dar un pequeno paseo pola ría de Arousa. Nós non quixemos perder a oportunidade e embarcamos o venres nesta singular singradura que só poidemos desfrutar polo interior da ría, debido ó mar picado que tivemos esa tarde.
Ás seis en punto arrancamos do peirao deportivo de Rianxo e, despois dunha breve explicación da historia do veleiro (que para o vindeiro ano fará 100 anos da súa construción nos asteleiros do Freixo alá polo 1916), comezamos a navegar desfrutando das marabillosas vistas que se aprecian dende o mar.
Durante o percorrido tivemos ocasión de comprobar a magnífica condución duns pequenos capitáns que desfrutaron arreo levando o veleiro, con máis ou menos alegría dos maiores que por un lado enrabechamos coa sorte deles por poder levalo e, por outro, tivemos que soportar os meneos que nos metían…
Cando desembarcamos, dúas horas despois de partir, non quixemos pasar sen sacarlle a foto á homenaxe que en Rianxo hai ós mariñeiros caídos no mar.
E, como non, deixámovos tamén o enlace ó blog coa historia do Joaquín Vieta: www.joaquinvieta.com/historia
Fotos de Rianxo 
Deixar unha resposta