Por segundo ano consecutivo, a asociación Ondiñas Maiñas puxo en marcha a iniciativa Viladomar Rianxo – Máis alá dos muros. De que se trata? Pois de levar a arte preto das nosas casas. De converter os muros nun lenzo para que diferentes artistas nos acheguen historias, cores e beleza. O resultado é espectacular.
Como indican dende Ondiñas Mainas, detrás hai un tremendo esforzo e o apoio do Concello de Rianxo e da Deputación da Coruña “para conseguir que Rianxo marque o camiño tamén en Arte Urbana na zona do Barbanza”.
En Tanxil contamos cun mural feito por Batalla, un artista local. Segundo nos explicou, no lugar pescaban calamar ao chinchón, así que quixo representar iso. Ademais, no areal, en 1976 barou unha balea que despois sería a protagonista dun conto de Rafael Dieste titulado “De como veu a Rianxo unha balea”.
No Araño tamén contamos cun impresionante mural que adornará o centro social da parroquia. Ao igual que o resto de obras non están completadas, pero podedes ver que vai ser marabilloso. 
Na Casa da República de Isorna actuou a artista Doa. Representou unha pranta medicinal que está presente na xeografía galega. De novo, moita cor e unha idea que encaixa coa contorna. 
Preto do auditorio temos esta enorme representación de Castelao. Recomendamos a todo o mundo que se achegue a admirar como queda. 
Na Ribeira, xunto ao antigo bar Lúa, este muro de bloques loce dende esta semana con estas representacións. 
O mural máis céntrico está xunto ao pavillón polideportivo. De novo, moita cor e un gran coidado dos detalles para un muro de grandes dimensións. 
Por último, un dos piares da ponte que cruza cara á praia da Torre tamén conta dende xa coa súa representación artística. 
Fotos de Rianxo 
Deixar unha resposta