O pasado sábado 9 de novembro tivemos o grande orgullo de poder presentar no Auditorio a exposición de “Ruando Rianxo”. Moitos fostes os que nos acompañastes nese momento tan especial e tan emotivo para nós. Pero a maior satisfacción foi, sobre todo, poder ver as vosas caras, saber que gustou e que xa queredes Ruando Rianxo 2 🙂
Ese día nós deixamos a cámara a un lado, así que lle agradecemos a Helena Villar Janeiro, a Carlos Abella e a Rebeca Losada que nos facilitaran o testemuño gráfico daquel momento.
Como vedes, aínda érades un bo feixe os que decidestes, a pesar do mal tempo e das horas complicadas, estar con nós no Auditorio.
Os primeiros en falar, como non, foron o alcalde, Adolfo Muíños e a concelleira de cultura, Hadriana Ordóñez. A verdade é que foron palabras moi sentidas as que tiveron con nós. Eles apoiaron este proxecto dende o primeiro momento e só podemos ter palabras de agradecemento co Concello, por todo o que nos axudaron e pola liberdade que nos deron.
Despois tocounos o turno a nós. Certamente, como dixemos, era imposible recompilar en fotografías toda a riqueza humana de Rianxo, pero tratamos de que xente se sentise representada e de facer unha pequena homenaxe a cada un dos nosos veciños. O maior activo e valor dun lugar son as súas xentes e Rianxo é moi rico en persoas. Na exposición están mesturados membros da Real Academia da Lingua, con escritores, artistas, arcebispos, mariñeiros, albaneis, persoas dependentes… Todos formamos parte de Rianxo e todos somos unha peza importante desa historia viva que se constrúe día a día.
Para pechar o acto, grandes músicos deleitáronnos co seu talento. En primeiro lugar, puidemos desfrutar cos Rosales de Asados e con pezas escritas polo propio José Romero.
Tamén tocaron Sabela Galbán e Antón Alcalde, músicos moi novos e que teñen un gran futuro por diante: 
Queremos agradecerlle a David e ao Toffe os estupendos pinchos que nos puxeron, para que todos os asistentes puidesen levar un bo recordo do acto tamén no estómago. Como dixen de broma durante o acto, agardaba que ninguén estivese por alí polos pinchos 🙂 Pero certamente, David, portácheste de 10!
Fotos de Rianxo 
Gracias a vos por ese traballo tan ben feito que ágora podemos ver todos.