Un dos días máis esperados por todos os rianxeiros nas festas da Guadalupe é o feirón mariñeiro. Semella que leva toda a vida celebránse, pero van 12 edicións deste popular evento que reúne a todos os veciños polas rúas da vila, comentando, cantando, bailando, comprando e desfrutando do día.
De novo o mal tempo fixo que por segundo ano consecutivo o feirón se trasladase do xoves ao domingo. E a pesar das críticas dalgúns, de novo volveu ser un éxito, xa que o feirón semella triunfar en calquera día que se poña. Agora, que saia o sol e se poida estar a gusto nas rúas agradécese un montón.
De feito, dende primeira hora mesturábase a xente ataviaba para a ocasión co outro feirón, o do mercadillo que hai na praza de Castelao. Tiñamos xa ganas de botar todo o día na rúa e despedir as festas en condicións despois de días de tan mal tempo.
O curruncho adicado á historia de Rianxo a través das súas xentes volveu ser un dos puntos de encontro, onde poder ver como cambiamos, que cousas se conservan, como celebraba a xente antes as festas, como se traballaba, como se foi transformando a localidade…
E no medio da vila os postos distribuíanse ao longo das rúas e prazas. Alí, curiosos e compradores puideron desfrutar sobre todo de elementos de artesanía e comida.
Os máis novos puideron aprender incluso oficios case esquecidos ou que habitualmente non temos o pracer de poder ver de primeira man. 
Pero o que caracteriza o feirón é sobre todo as ganas de pasalo ben dos veciños. Todo o mundo que sabe tocar algo sae á rúa cun instrumento para desfrutar e facer desfrutar os demais. 
Como se pode apreciar na imaxe, a medida que transcorría a mañá a xente ateigaba o feirón. 
Moitos aproveitaron para comer tamén no medio das rúas e prazas, ao aire libre, desfrutando do bo tempo e do ambiente inmellorable. 
Iso si, algún precisaba dunha boa soneca para recuperar folgos.
A tarde avanzaba e os rapaces podían desfrutar dos obradoiros de artesanía dos diferentes postos. 
Na praza da Igrexa todo estaba preparado para a noite folk. 
Pero a xente ía tirando para a praza da Manuela, xa que alí estaban convocados todos os veciños ás 19.30 horas para tocar en común. 
Un dos temas que non faltou foi A Camposa, dos Rosales. Non só se tocou con enerxía, senón que se bailou a rabiar. 
Soou tamén A Rianxeira, como nón, e o Pájaro Pinto. 
Foi máis de media hora de non parar. 
A noite ía chegando, e na praza da Igrexa tocaba o grupo Río Anxo. 
Mentres que ás 21.30 horas, ao lado do Auditorio comezaba a actuación de Aché, que tocou para gañarse un posto na Guadalupe 2016, onde agardamos poder estar outro ano máis con todos vós 😉
Fotos de Rianxo 
Unha resposta a “Fotos das Festas da Guadalupe 2015: o feirón mariñeiro”