Este ano celebrouse o VII Feirón Mariñeiro, onde ademais de postos de artesanía e gastronomía tamén puidemos desfrutar de obradoiros e animación de rúa. Para os que non o desfrutástedes, aquí vos deixo unha selección dos mellores momentos. E para o ano que non falte ninguén 😉
Outra das actividades celebradas é a mostra de xogos tradicionais. Aquí vos deixo unha serie de fotos onde podemos ver como se divirten tanto nenos coma maiores.
Como non podía ser doutra forma nas festas da Guadalupe tamén hai espazo para as culturas urbanas, principalmente break dance. A continuación, déixovos unha mostra.
Velaquí unha serie de fotos dos fogos artificiais do domingo á noite.
Velaquí fotos do día grande, do domingo, coa procesión da Virxe da Guadalupe.
Como cada ano intentarei poñer aquí un relato exhaustivo do que foron as festas de Rianxo deste ano. E fareino por orde cronolóxica, así que hoxe toca comezar co primeiro día, co venres do chupitaso.
NOTA: se alguén quere o orixinal dunha foto na que saia ou se sinte molesto porque aparece aquí, que me escriba ao correo que teño indicado en Info.
Como moitos sabedes, para o ano haberá menos días de festa na Guadalupe. Para min particularmente é unha decepción. Unha decepción porque non fago máis que escoitar que a xente de Rianxo vive como ninguén as súas festas. Porque sempre oio como os de aquí presumen con orgullo de teren as mellores festas de Galicia. Pois ao final vai ser que non todo é tan bonito como o pintaban ou que hai moita hipocrisía na rúa.
Ante a perspectiva de que ante os moitos gastos que xeraba a festa ou ben os rianxeiros pagaban algo máis de cota ou ben había que recortar os días, a xente votou por isto último. Polo que dixeron houbo trinta e pico votos nulos, 555 votos a favor de pagar máis cota e 653 a favor de baixar os días. Hai que recoñecer que na comisión de festas son uns señores por darlle a oportunidade á xente da vila de escoller que opción preferían. Pero tamén teño que dicir que eu non o faría, eu directamente subiría a cota. E por que o digo? Pois porque creo que 60 euros por matrimonio non é tanto. Se temos en conta que son sete días de festa (sen contar o primeiro venres), pois cada día ten un custo para cada un dos membros da parella de 4,28 euros. Son moitos cartos? Que pasa, que non podemos pasar algún día sen tomar unha cervexa ou un cubata e destinar ese diñeiro para as festas?
Vamos, creo que a xente se queixa de vicio. Os matrimonios de xubilados pagan (iso creo) 30 euros, que tampouco é excesivo. E despois está a xente nova, que tamén debería de contribuír con algo de cartos. É un pouco triste ver o número de juadalupeñas que hai en Rianxo e que o día do chupitaso poucas foron as que se citaron, porque para facelo todos os membros teñen que poñer 1 euro (que despois se destinan a gastos como o concerto de Rock in Rian ou as actividades do día das Juadalupeñas).
E subiría tamén a cota directamente porque sei de máis dun matrimonio que en lugar de pagar os 60 euros paga 30 ou 40 e tivo tamén dereito a votar. Vamos, que se xa non pagas a cota actual, está claro que non vas querer pagar máis. E, pola contra, eu, que son do Araño e que levo tres anos dando cartos para as festas de Rianxo, porque tamén considero que son miñas e porque as desfruto coma o que máis, pois non tiven dereito a votar. Aproveito tamén para dicir que no Araño se pagan 80 euros para as festas (este ano non, porque non houbo comisión nin festa) por só tres días e con orquestras de terceira.
Para rematar, só dicir que o sinto sobre todo pola xente da Comisión de Festas que fan un gran traballo. O presidente, o Xixí, cando comunicaba a decisión de baixar os días enriba do palco da Marbella, dicía que se sentía triste, porque sempre se esforzaron por facer das nosas unhas festas de sona e de recoñecemento. A iso das 8 da mañá vino polo campo de arriba e feliciteino persoalmente a el e á xente da comisión polo gran traballo que fixeron (e que fan ano a ano). E díxenlle que non estaba de acordo cunha cousa que dixo, xa que pediu perdón por se se equivocaran en algo ou fixeran algo mal. Díxenlle que non tiña porque pedir perdón, porque sempre actúan de corazón e pensando no mellor para a vila e a Guadalupe. As cousas poden saír mellor ou peor, pero detrás hai moitas horas e o labor de todo un ano. Criticar é moi sinxelo, pero xa me gustaría ver a min a todos aqueles que falan mal xestionando as festas e agora tendo que decidir que é o que se recorta para o ano: o día de Padrón?, o día das Juadalupeñas?, o feirón?, Rianxolandia?, os xogos populares?…
Por primeira vez en 13 anos de historia das festas, no 2011 non poderemos cantar iso de “P’ó ano 15 días, p’ó ano 15 días”, pero si que cantaremos “P’ó ano sete días, p’o ano sete días”.
Este ano no Araño non houbo festa entendida no sentido lúdico, con verbena e orquestras pola noite ata as tantas da madrugada. Non obstante, non faltou a romaría do domingo:
Velaquí podemos ver ao cura, don Manuel, á dereita, durante a procesión:
Tampouco faltou o camión que trae sandias e melóns:
Nin o bar cheo de xente, que aproveita ata o último minuto antes de ir comer á casa:
Como sabedes, o patrón dos condutores é San Cristóbal (ou San Cristovo en galego), unha festividade que ten unha celebración moi curiosa en Rianxo. Non sei se noutras localidades galegas se celebra da mesma forma ou non, pero no noso concello organízase unha caravana de coches totalmente engalandos que percorres Rianxo, Asados, O Araño e Taragoña facendo soar os pitos e dándolle moito colorido ás estradas.
Edito: noutros concellos tamén se celebra, como acabo de descubrir no xornal Certo.es
Ademais, este 2010 a caravana foi un auténtico éxito, pois nunca vira tanta participación: máis de 6 minutos consecutivos de coches, motos e camións.
Fotos de Rianxo 
