Os que cruzades habitualmente a autovía do Barbanza, ben camiño de Ribeira ou ben cara a Padrón, de seguro que pasáchedes máis dunha vez por esta ponte. O mellor é pasala con calma, desfrutar das vistas e pensar en volver cruzala de novo outra vez, con sol mellor que mellor.
As tardes calorosas vólvense coloradas cando saben que chega a noite, porque nesas horas todo pode pasar.
Como vos dixen xa nalgún outro post, en Rianxo hai dúas formas de chamarlles aos sitios: a oficial e a que emprega a xente. Ocorre por exemplo neste caso. A fotografía de arriba corresponde coa praza da Manuela, que polo visto era unha embarcación invencible en toda a Ría de Arousa e que gañaban en todas as competicións.
Non obstante, cando a inauguraron, a xente de Rianxo preguntábase “Que coño é iso?” e así foi como lle quedou o nome da Praza do Coño. Simpática historia, verdade 😀
Como toda parroquia galega que se prece, a de Asados tamén ten a súa, a de Santa María.
Aínda que é moito máis coñecida e bonita a praia que ten ao seu carón, a das Cunchas, trátase dunha praia bastante descoñecida para moita xente. É un areal inmenso, no que nunca fai faltar espazo para poñer a toalla e que está nun lugar resgardado se se teñen nenos.
Moitas veces pasamos ao seu carón, case sen prestarlles atención. Simbolizan o pasado, pero tamén a cultura, o traballo, as mans, as crenzas, a relixión e todo o que foi a nosa terra.
Moitos, coma este cruceiro da Somoza, en Asados, álzanse maxestousos, semellando querer tocar o ceo, estando máis preto de alá que de aquí. A súa función é lembrarnos a paixón de Cristo, a súa morte e o sufrimento que experimentou. Eu véxoo como un símbolo do que fomos. Pero tamén do que podemos ser. Podemos tocar o ceo, crer no que somos, loitar por aquilo que nos gusta e intentar ser cada día mellores persoas.
Ás veces, semella que nalgúns lugares hai anos polos que non pasa ninguén. Sitios abandonados, deixados da man de Deus, pero que no seu día tiveron vida e bulicio.
É o caso de moitos dos muíños que podemos atopar seguindo o curso do río Té. Hoxe en día fican completamente abandonados, adaptándose á contorna, cubertos de hedras, sen tellado nin portas.
Hoxe cólgovos aquí unha imaxe impresionante do monte do Araño. Ao fondo, sobre o Pico Muralla, vense unhas nubes preciosas que lle dan ao ceo un toque máxico.
En Rianxo hai bastante sentido do humor, por iso, ás novas casetas dos pescadores que fixeron os de Portos chámanlle o Bingo. Creo que non fai falta dar explicacións, non si?
Como estes días está a facer moi bo tempo, é unha gozada contemplar como a vila de Rianxo se mira no mar.
Concello de Rianxo
Fotos de Rianxo 