Dentro da exposición de Ruando Rianxo, tamén terá presenza a actividade conserveira do noso Concello. Nese sentido, estivemos na Conserveira de Rianxo e falamos con José Ignacio Rodríguez, o seu director financeiro e administrador. Como na mostra non podemos colgar todas as imaxes que nos gustaría, aquí deixamos colgadas un feixe delas.
Velaquí a fermosa canción de “Rianxo Pájaro Pinto”, cantada polo grupo O Fiadeiro de Vigo (a partir do minuto 2:25):
Onte chegamos ás 100.000 visitas no blog, así que vos queremos dar as grazas as dúas persoas que conformamos fotosderianxo.com! A verdade é que están a ser meses moi intensos e estamos moi agradecidos por todo o voso apoio e cariño, tanto a través do blog, como do facebook e dos encontros en persoa para a exposición de Ruando Rianxo.
Ademais, curiosamente onte batemos a marca de visitas, con 2.342 grazas ás imaxes dos photocall da Pasarela da Lúa 2013. Vemos que estades moi pendentes desas fotos, así que sabede que as estamos rematando de editalas todas 😉
Sorprende saber que cando un se ergue polas mañás, Nieves Vicente Varela (O Araño, 1967) xa leva horas esperta, traballando, e seguramente a collamos camiño a Negreira, Santa Comba, Camariñas… vender os produtos que ela mesma cultiva. O traballo dos empresarios agrícolas non ten horario. Non se rexe polo sol, nin moito menos, xa que a maior parte dos días se erguen antes de que canten os galos e a noite os colle aínda no choio. Falamos con ela do seu día a día e tamén da labor que fai como membro do Pleno da Corporación Municipal de Rianxo. Nieves estará tamén dentro da exposición de Ruando Rianxo que inauguraremos o mes que vén no Auditorio.
Cheo ata a bandeira. Había expectación onte en Rianxo por ver o que deparaba a Pasarela Castelo da Lúa e non defraudou. Xa antes da apertura de portas había moita xente esperando fóra do pavillón polideportivo municipal. É máis, o foro do recinto quedouse pequeno para tal evento e houbo persoas que tiveron que quedar fóra por cuestións de seguridade.
É todo sorriso. Silvia Ferré Casar é desas persoas que che transmiten optimismo e vitalidade. De seguro que moitos a coñecedes porque estivo cantando na orquestra Gran Parada moito tempo e actualmente é a vocalista do grupo de Roi Casal. Pero se mañá ides á pasarela Castelo da Lúa (que terá lugar no pavillón de deportes de Rianxo a partir das 20.00h) poderedes ver as súas creacións, a través da súa marca SFC Artesanía Creativa. Nesta entrevista pasamos a coñecela un pouco máis. Ademais, o mes que vén tamén terá o seu lugar na na exposición de Ruando Rianxo que inauguraremos no auditorio.
Se queres apuntarte a baile, gaita, acordeón ou pandeireta, agora podes facelo cos de Vai de Roda. As inscricións realizaranse no Pazo de Martelo os sábados pola tarde do mes de outubro, ben a través do seu blog www.vaideroda.org ou ben no correo vaiderodarianxo@gmail.com:
Es de Asados ou do Araño e tes mala cobertura móbil dende hai unhas semanas? Entó é que tes o móbil con Vodafone ou con algún outro operador que vai pola súa redes, como móbilR ou Pepephone.
Aínda que parece mentira, isto non é unha corte ou un cortello, senón que era a vivenda de dúas persoas:
Grazas a Rabunho Rexeita descubrín que aquí vivía unha señora chamada Urbana e o seu fillo Chucho. No Araño coméntase que Urbana era unha persoa moi rica, que tiña moitos cartos (ata o punto de que incluso usaba billetes para acender os pitillos, aínda que como toda historia, pode ser inventada e máis propia dunha película). O caso é que tiña un gran problema: o alcol. Bebía moito. Ata tal punto era a súa dependencia que non facía máis que malvender as propiedades. Coméntase tamén que nunha aposta perdeu a súa fermosa casa nas Miráns e acabou xunto ao seu fillo nesta pequena vivenda que, como vedes, só ten unha porta e unha fiestra.
O caso é que o fillo, criado nese ambiente, tamén era unha persoa moi dependente do alcol e incluso podía ter algún problema psiquiátrico, pero era xente moi apreciada polos veciños. De feito, entre todos xuntáronse, reuniron material de construción e fixéronlle esta pequena vivenda nos Outeiriños:
Coméntase que cando os veciños entraron na outra vivenda para a mudanza, dentro había excrementos, polo que as condicións nas que vivían non eran as máis adecuadas.
Eu teño que dicir que de Urbana non me acordo, pero de Chucho si. De feito, precisamente grazas a Rabunho Rexeita descubrín unha foto del, que chega a nós grazas ao traballo que comezaron Miguel Somoza Rodríguez e Suso Santos Rodríguez e que pode verse nesta páxina.
Fotos de Rianxo 